ప్రధానగాయకునికి. అల్ తష్హేతు అను రాగముమీద పాడదగినది. గుహలో దావీదు సౌలునొద్దనుండి పారిపోయినప్పుడు, అతడు రచించినది. అనుపదగీతము.
1 నన్ను కరుణింపుము దేవా నన్ను కరుణింపుము
నేను నీ శరణుజొచ్చియున్నాను
ఈ ఆపదలు తొలగిపోవువరకు నీ రెక్కల నీడను
శరణుజొచ్చియున్నాను.
2 మహోన్నతుడైన దేవునికి
నా కార్యము సఫలముచేయు దేవునికి నేను మొఱ్ఱ
పెట్టుచున్నాను.
3 ఆయన ఆకాశమునుండి ఆజ్ఞ ఇచ్చి నన్ను రక్షించును
నన్ను మ్రింగగోరువారు దూషణలు పలుకునప్పుడు
దేవుడు తన కృపాసత్యములను పంపును.(సెలా.)
4 నా ప్రాణము సింహములమధ్య నున్నది
కోపోద్రేకులమధ్యను నేను పండుకొనుచున్నాను
వారి దంతములు శూలములు అవి అంబులువారి నాలుక వాడిగల కత్తి.
5 దేవా, ఆకాశముకంటె అత్యున్నతుడవుగా నిన్ను
కనుపరచుకొనుము
నీ ప్రభావము సర్వభూమిమీద కనబడనిమ్ము.
6 నా అడుగులను చిక్కించుకొనుటకై వారు వలయొడ్డిరి
నా ప్రాణము క్రుంగియున్నది.
నా యెదుట గుంట త్రవ్వి దానిలో తామేపడిరి.(సెలా.)
7 నా హృదయము నిబ్బరముగా నున్నది
దేవా, నా హృదయము నిబ్బరముగా నున్నది
నేను పాడుచు స్తుతిగానము చేసెదను.
8 నా ప్రాణమా, మేలుకొనుము స్వరమండలమా
సితారా, మేలుకొనుడి
నేను వేకువనే లేచెదను.
9 నీ కృప ఆకాశముకంటె ఎత్తయినది
నీ సత్యము మేఘమండలమువరకు వ్యాపించియున్నది.
10 ప్రభువా, జనములలో నీకు కృతజ్ఞతాస్తుతులు నేను
చెల్లించెదను
ప్రజలలో నిన్ను కీర్తించెదను.
11 దేవా, ఆకాశముకంటె అత్యున్నతుడవుగా నిన్ను
కనుపరచుకొనుము.
నీ ప్రభావము సర్వభూమిమీద కనబడనిమ్ము.
—https://api-cdn.youversionapi.com/audio-bible-youversionapi/672/32k/PSA/57-a1e927d32ba313c3c8b903c9604d6bb5.mp3?version_id=1787—